ການຮັບເງິນໂອນຈາກຕ່າງປະເທດຂອງ BCEL
ຂຽນເມື່ອ March 12, 2014, ໃນຫມວດ ຊີວິດ.
***ອ່ານອັບເດດໄດ້ຢູ່ລຸ່ມໆ***
ມະຫາກາບການຮັບເງິນໂອນຈາກຕ່າງປະເທດຂອງທະນາຄານ BCEL ດຳເນີນຕໍ່ໄປ
ເປັນເວລາ 13 ມື້ແລ້ວທີ່ໂອນເງິນມາຈາກສິງກະໂປມາໃຫ້ບັນຊີ BCEL ແຕ່ຈົນປານນີ້ກໍຍັງບໍ່ໄດ້ຮັບ. ພໍສອບຖາມ BCEL ໄປກໍບອກວ່າຜູ່ໂອນຫັ້ນ ໂອນຜ່ານ JP Morgan ເຊິ່ງທາງ BCEL ຍົກເລີກສັນຍາກັບ JP Morgan ແລ້ວ ຈຶ່ງເຮັດໃຫ້ບໍ່ໄດ້ຮັບເງິນ. ອັນນີ້ເປັນຄວາມຜິດຂອງຜູ່ຮັບເງິນເອງທີ່ບໍ່ຮູ້ວ່າທະນາຄານເຂົາຍົກເລີກສັນຍາກັນ ແລະທາງ BCEL ກໍບໍ່ໄດ້ສົນໃຈ ເພາະຄິດວ່າແຈ້ງໃນເວັບໄຊແລ້ວ ແຕ່ວ່າໃນເວັບໄຊບໍ່ໄດ້ແຈ້ງ ສະນັ້ນກໍເປັນຄວາມຜິດຂອງຄົນຝ່າຍເຮັດເວັບ ບໍ່ກ່ຽວກັບຝ່າຍ FX
ແລ້ວບາດນີ້ເງິນມັນໄປຢູ່ໃສ? ຖາມນຳທະນາຄານຕົ້ນທາງກໍບອກວ່າບໍ່ໄດ້ຮັບເງິນຕີກັບມາ ສະແດງວ່າເງິນໄປຮອດແລ້ວ… ແຕ່ຜູ່ຮັບບໍ່ໄດ້ຮັບເງິນເທື່ອ? ມັນເປັນໄປໄດ້ແນວໃດ???
ສອບຖາມກັບໄປຫາ BCEL ອີກກໍບອກວ່າເງິນຖືກຕີກັບໄປແລ້ວ ແລະຖືກສົ່ງຜ່ານ Citibank ແທນ ແຕ່ຜູ່ຮັບຕ້ອງເສຍເງິນ $40 ເປັນຄ່າຕີກັບ ແລະແນ່ນອນວ່າຜູ່ຮັບຜິດເອງທີ່ບໍ່ຮູ້ວ່າ BCEL ກັບ JP Morgan ເຂົາຍົກເລີກສັນຍານຳກັນແລ້ວ ສະນັ້ນ ໃຜບໍ່ຮູ້ ຄົນນັ້ນກໍເປັນຄົນຈ່າຍ… ເອີ ໃຫ້ມັນໄດ້ຈັ່ງຊີ້
ແຕ່ກ່ອນໃຊ້ JDB ຮັບເງິນແຕ່ລະເດືອນ ບໍ່ເຄີຍມີບັນຫາ ຮັບກົງເວລາຕະຫຼອດ ເສືອກຢາກອວດເກັ່ງໄປໃຊ້ BCEL ຮູ້ທັງຮູ້ວ່າເປັນທະນາຄານອັນດັບນຶ່ງຂອງປະເທດ ບໍ່ຮູ້ຈັກຈຽມ ທະນາຄານນີ້ເຂົາບໍ່ສົນໃຈດອກ ເງິນໃຜກັບເງິນໃຜ ແນວວ່າທະນາຄານເພິ່ນມີລູກຄ້າຫຼາຍສຸດເດເນາະ -“-
ເສຍເວລາ ເສຍຄວາມຮູ້ສຶກ ແລ້ວຍັງເສຍເງິນອີກ ເຊົາໃຊ້ມັນເທາະ BCEL ກັບໄປໃຊ້ JDB ດີກວ່າ ບໍ່ມີ Online Banking ກໍໂທຖາມເອົາລະກັນວ່າເງິນເຂົ້າຫຼືຍັງ
ເລື່ອງນີ້ສອນໃຫ້ຮູ້ວ່າ:
- ຖ້າດົນກວ່າ 5 ມື້ເຂົ້າການແລ້ວຍັງບໍ່ໄດ້ເງິນ ໃຫ້ໂທຖາມ
- ເວລາຈະຮັບເງິນໂອນ ໃຫ້ຖາມນຳທະນາຄານກ່ອນວ່າຕ້ອງຮັບຜ່ານທະນາຄານໃດ ແລະຫ້າມຮັບຜ່ານທະນາຄານໃດ ພ້ອມກັບບອກຂໍ້ມູນນີ້ກັບຄົນໂອນນຳ
- ຢ່າຄິດວ່າທະນາຄານທີ່ຄົນໃຊ້ຫຼາຍທີ່ສຸດຈະດີທີ່ສຸດ ບາງຄັ້ງມັນກໍບໍ່ເປັນແບບນັ້ນສະເໝີໄປ
- ທະນາຄານບໍ່ເຄີຍຜິດ ຖ້າມີຫຍັງເກີດຂຶ້ນ ລູກຄ້າຕ້ອງເສຍເງິນຄ່າຕີກັບເອງ
ຊີວິດ!
ຄືເອົາເຂົ້າແທ້ໆແລ້ວຢາກຖາມວ່າ ການທີ່ໄປຍົກເລີກສັນຍາຫຍັງນຳທະນາຄານໃດ ຈົນເຮັດໃຫ້ມັນມີຜົນກະທົບໃນວົງກວ້າງ ເປັນຫຍັງບໍ່ແຈ້ງລ່ວງໜ້າ? ຖ້າການຍົກເລີກສັນຍາກັບ JP Morgan ມັນເຮັດໃຫ້ຄົນອື່ນຕ້ອງຮັບເງິນໂອນບໍ່ໄດ້ ແລ້ວຍັງຕ້ອງເສຍເງິນຄ່າທີ່ເງິນໂອນຖືກຕີກັບຫັ້ນ ເປັນຫຍັງບໍ່ບອກກ່ອນ? ເສຍທັງເວລາ ທັງຄວາມຮູ້ສຶກ ແລ້ວຍັງເສຍທັງເງິນອີກ. ຖາມຝ່າຍ FX ກໍຕອບວ່າແຈ້ງແລ້ວ ແຈ້ງໃນເວັບ... ຂໍໂທດເທາະ ຂ້ອຍກຳລັງເປີດໜ້າເວັບ BCEL ຢູ່ ເຈົ້າແຈ້ງຢູ່ໜ້າໃດ? ກໍພັດຕອບວ່າສົງໄສພະນັກງານເວັບໄຊບໍ່ໄດ້ອັບເດດເທື່ອ… ເອີ ດີ! ແລ້ວຈັ່ງໃດ? ປັດຄວາມຮັບຜິດຊອບໄປໆມາໆ ປານເດັກນ້ອຍເຮັດວຽກ.
ຖ້າບໍ່ໂທໄປນຳ ກໍຄືຊິບໍ່ໄປຮອດໃສຈັກເທື່ອ ຍອມນຳ. ບໍ່ແມ່ນຍ້ອງທະນາຄານອື່ນດອກ ແຕ່ທະນາຄານອື່ນມັນທະນາຄານນ້ອຍໆ ຄົນໃຊ້ໜ້ອຍ ແຕ່ມັນຍັງບໍ່ເຄີຍເຮັດໃຫ້ຜິດຫວັງ ບໍ່ເຮັດໃຫ້ເສຍເວລາ ເສຍເງິນ ແລ້ວກໍເສຍຄວາມຮູ້ສຶກແບບນີ້.
ລະບົບມັນດີ ມີຄວາມເປັນໄປໄດ້ໃນການຮອງຮັບການນຳໃຊ້ຫຼາຍ ແຕ່ການຈັດການບໍລິຫານບໍ່ໄດ້ເລື່ອງ. ເຊິ່ງເຖິງເຮົາຈະເປັນລູກຄ້າລາຍນ້ອຍໆ ຈົນທາງທະນາຄານເພິ່ນບໍ່ສົນໃຈ ຫຼືໃສ່ໃຈຫຍັງນຳ ເຮົາກໍມີເວລາທີ່ຈຳກັດຂອງເຮົາ ບໍ່ສາມາດເອົາເວລາໄປນຳເງິນໄດ້ທຸກມື້ທຸກເວັນ ເສຍວຽກເສຍການ. ຍ້າຍກັບໄປໃຊ້ທະນາຄານເກົ່າດີກວ່າ. ຫວັງວ່າອີກ 5 ປີ ຫຼື10 ປີຊິດີກວ່ານີ້.
ອັບເດດຫຼ້າສຸດ ມື້ນີ້ (13 ມີນາ 2014) ໃນທີ່ສຸດກໍໄດ້ຮັບເງິນແລ້ວ ຂອບໃຈທຸກຝ່າຍທີ່ນຳເລື່ອງໃຫ້ ຂອບໃຈຫຼາຍໆ ແລະກໍຂໍໂທດນຳທຸກຄົນທີ່ເດືອດຮ້ອນໄປນຳ ກໍບໍ່ຮູ້ຊິວ່າແນວໃດ ເຮົາກໍເດືອດຮ້ອນ ໄປຮັບປາກຄົນອື່ນວ່າຊິໂອນເງິນໃຫ້ ຄິດວ່າເງິນຊິມາຕາມກຳນົດຄືທຸກເທື່ອ ພັດວ່າຊ້າແລ້ວຊ້າອີກ ຈົນບໍ່ຮູ້ຊິເອົາໜ້າໄປໄວ້ໃສລະ ມື້ໃດກໍບອກວ່າມີບັນຫານຳທະນາຄານ ປານໄປຕົວະເຂົາເຈົ້າ. ແຕ່ບໍ່ເປັນຫຍັງ ບາດນີ້ກໍປ່ຽນໄປຮັບເງິນຜ່ານທະນາຄານເກົ່າເອົາ ລ້າສະໄໝໜ້ອຍນຶ່ງ ໄດ້ໂທຖາມເອົາ ແຕ່ສະບາຍໃຈກວ່າ.
ສຸດທ້າຍກໍມີແຕ່ຢາກບອກວ່າ ບໍ່ໄດ້ໂທດທະນາຄານ ເພາະໂຕທະນາຄານມີລະບົບທີ່ດີ ແຕ່ການສື່ສານ ການຈັດການບັນຫາຕ່າງໆ ມັນຍັງບໍ່ທັນໃຈເທື່ອ ກໍເຂົ້າໃຈຫັ້ນລະ ວ່າລູກຄ້າຫຼາຍ ແຕ່ຖ້າລູກຄ້າຫຼາຍ ກໍຄວນປັບປຸງຄົນ ເພີ່ມຄົນໃຫ້ເໝາະກັບສະພາບການທີ່ປ່ຽນໄປ. ເພາະບາງທີກໍຮູ້ສຶກວ່າ ເຮົາໄປທະນາຄານນ້ອຍໆ ແຕ່ອຸ່ນໃຈ ດີກວ່າໄປທະນາຄານໃຫຍ່ໆ ແຕ່ບໍ່ຮູ້ຈັກໃຜເລີຍ.
ອັບເດດວັນທີ 14 ມີນາ 2014: ທາງຕົວແທນຂອງທະນາຄານໂທມາຊີ້ແຈງເລື່ອງທີ່ເກີດຂຶ້ນ ໂດຍລະບຸວ່າ
1. ການປິດບັນຊີຂອງ JP Morgan ເກີດຂຶ້ນໃນເດືອນ 2
2. ທະນາຄານ BCEL ໄດ້ພະຍາຍາມແຈ້ງໃຫ້ລູກຄ້າແລ້ວ ແຕ່ກໍບໍ່ສາມາດແຈ້ງໃຫ້ຄົບຖ້ວນໄດ້
3. ທະນາຄານບໍ່ສາມາດຮູ້ໄດ້ວ່າມີເງິນຈາກໃສຄ້າງແດ່ ເວັ້ນເສຍລູກຄ້າຈະແຈ້ງໄປແລ້ວທະນາຄານຈຶ່ງສາມາດນຳໃຫ້ໄດ້ ແຕ່ການນຳໃຫ້ກໍບໍ່ສາມາດເລັ່ງລັດໄດ້ ເພາະເປັນການເຮັດວຽກຂອງສອງ ຫຼືຫຼາຍກວ່າສອງທະນາຄານຮ່ວມກັນ ດັ່ງນັ້ນ ຕ້ອງຖ້າໃຫ້ທະນາຄານອື່ນຕອບກັບມາຈຶ່ງຈະສາມາດຕອບລູກຄ້າອີກເທື່ອນຶ່ງໄດ້
4. ການຫັກເງິນ $40 ບໍ່ຮູ້ໃຜຫັກ ບໍ່ແມ່ນ JP Morgan ກໍຄືຊິແມ່ນທະນາຄານຕົ້ນທາງທີ່ດຶງເງິນກັບ
5. ທາງ BCEL ໄດ້ພະຍາຍາມເຕັມທີ່ໃນການຕິດຕາມແລະຊ່ວຍເຫຼືອແລ້ວ
ຟັງແລ້ວກໍບໍ່ມີຫຍັງຊິເວົ້າ ກໍໄດ້ແຕ່ຂອບໃຈທີ່ແຈ້ງມາ ແລ້ວກໍໄດ້ແຕ່ຖອນຫາຍໃຈຍາວໆ ວ່າເປັນການຕັດສິນໃຈຍ້າຍທະນາຄານໃນຊ່ວງເວລາທີ່ບໍ່ຖືກຕ້ອງເອງ ເພາະກາຍເປັນວ່າຍ້າຍເອົາຕອນທີ່ JP Morgan ປິດບັນຊີຢູ່ລາວ ເຊິ່ງມີຜົນກັບທຸກທະນາຄານ (ຕາມທີ່ຕົວແທນຂອງ BCEL ບອກມາ) ກໍເລີຍເຮັດໃຫ້ຖືກຄາວຊວຍໄປ.
ກໍມີແຕ່ ຂອບໃຈອີກຄັ້ງນຶ່ງ ສຳລັບຕົວແທນ BCEL ທີ່ໂທມາຊີ້ແຈງແລະຂໍໂທດໃນເຫດການທີ່ເກີດຂຶ້ນ. ສຳລັບໃນນາມຂອງລູກຄ້າ ຜູ່ໃຊ້ບໍລິການແລ້ວ ກໍຜິດຫວັງ ແຕ່ກໍບໍ່ຊ່າງຊິວ່າແນວໃດ ເຮົາກໍວ່າເຮົາເສຍຫາຍ ເສຍທັງເວລາທັງຄວາມຮູ້ສຶກ ທັງເງິນ ສ່ວນທະນາຄານເພິ່ນກໍວ່າເຮັດດີທີ່ສຸດແລ້ວ ກໍຄືຊິສຸດແນວນັ້ນລະເນາະ.
Tags: bank, bcel, ການຄ້າ, ທະນາຄານ
9 ຄຳເຫັນກ່ຽວກັບເລື່ອງນີ້ to "ການຮັບເງິນໂອນຈາກຕ່າງປະເທດຂອງ BCEL"
Noy on March 13, 2014
ໂອຍຕາດນີ……ພີ່ນ້ອງຂ້ອຍໂອນເງິນມາແຕ່ຝຣັ່ງແຕ່ວັນທີ9/4/2014 ຂ້ອຍຍັງບໍ່ໄດ້ຮັບເງິນປານນີ້ ຈົນໄປຖາມຮອດທະນາຄານ ກະເວົ້າມື້ນັ້ນມື້ນີ້. ຈັ່ງແມ່ນຊາດ.
moskong on March 13, 2014
no goog
no on March 13, 2014
ຄືຈະບໍ່ຮອດ 5 ຫຼື 10 ປີດອກ ພາຍໃນປີ 2014 ກະໄດ້ໃຊ້ແລ້ວ Online Banking
no on March 13, 2014
ສາມາດ ດາວໂຫຼດ app ໄດ້ແລ້ວທັງ play store ແລະ app store ( jdb mobile banking )
sonsinsay on March 13, 2014
ໂຄດເຮ້ຍເລີຍ BCEL ດຽວນີ້ນ່າ ບໍສົມກັບຄຳວ່າເປັນທະນາຄານຊັ້ນນຳຂອງປະເທດເລີຍ. ບາງສາຂາຍິ່ງບໍລິການໂຄດເຮ້ຍ ໂດຍສະເພາະສາຂາ ທາດຫລວງ, ຄວນປ່ຽນພະນັກງານໃຫມ່ສາຄືຊິດີຂື້ນ, ໂດຍສະເພາະຫົວຫນ້າສາຂາຫັ້ນແຫລະໂຕການ, ຄຳຂັວນ, ທັນສະໄຫມ ວ່ອງໄວ ຫມັ້ນໃຈ, ແຕ່ເອົາຈິງ ການບໍລິການຄົນລະດ້ານກັນເລີຍ. ເຮ້ຍ ເຮ້ຍ ເຮ້ຍ
sonsinsay on March 13, 2014
ໂຄດເຮ້ຍເລີຍ BCEL ດຽວນີ້ນ່າ ບໍສົມກັບຄຳວ່າເປັນທະນາຄານຊັ້ນນຳຂອງປະເທດເລີຍ. ບາງສາຂາຍິ່ງບໍລິການໂຄດເຮ້ຍ ໂດຍສະເພາະສາຂາ ທາດຫລວງ, ຄວນປ່ຽນພະນັກງານໃຫມ່ສາຄືຊິດີຂື້ນ, ໂດຍສະເພາະຫົວຫນ້າສາຂາຫັ້ນແຫລະໂຕການ, ຄຳຂັວນ, ທັນສະໄຫມ ວ່ອງໄວ ຫມັ້ນໃຈ, ແຕ່ເອົາຈິງ ການບໍລິການຄົນລະດ້ານກັນເລີຍ. ເຮ້ຍ
x on March 13, 2014
@Noy “ພີ່ນ້ອງຂ້ອຍໂອນເງິນມາແຕ່ຝຣັ່ງແຕ່ວັນທີ9/4/2014”
ດຽວນີ້ເດືອນ 3 ພີນ້ອງເຈົ້າຂ້າມການເວລາໄດ້ວະນິ
55555555555555555
au8ust on March 13, 2014
@no ຂອບໃຈເດີສຳລັບຂໍ້ມູນເລື່ອງ JDB Mobile Banking ຫາກໍເຫັນວ່າມີ. ລອງໂຫລດມາແລ້ວມັນໃຫ້ໃສ່ PIN ບໍ່ຮູ້ວ່າແມ່ນຫຍັງ ລອງໃສ່ແນວໃດກໍບໍ່ໄດ້ ດຽວຊິໄປຖາມຢູ່ທະນາຄານເອົາ.
ໂບ້ on March 12, 2014
ເສຍຫມົດ ບໍ່ມີຄວາມຮັບຜິດຊ້ອບ ແບບນີ້ໃຜຈະກ້າ ຝາກເງີນນຳນໍ້ບັດນີ ຂ້ອຍເອງກໍຄິດວ່າຈະໄປເປີດບັນຊີນຳ BCEL ແຕ່ມາເກີດເລື້ອງແບບນີ້ ຂ້ອຍຢ້ານແລ້ວ