ການຂໍ VISA ຍີ່ປຸ່ນສຳລັບຄົນລາວ
ຂຽນເມື່ອ September 28, 2015, ໃນຫມວດ ຝອຍໃຫ້ຟັງ.
ມື້ນີ້ໄດ້ມີໂອກາດໄປເຮັດ VISA ທ່ອງທ່ຽວສຳລັບຄົນລາວເພື່ອໄປປະເທດຍີ່ປຸ່ນ ກໍເລີຍເກັບລາຍລະອຽດມາບັນທຶກໄວ້ ເພື່ອຈະເປັນປະໂຫຍດກັບຜູ່ຜ່ານມາອ່ານໃນໂອກາດຕໍ່ໄປ
ຂໍ້ມູນສ່ວນໃຫຍ່ສຳລັບການຂໍວິຊ່າຍີ່ປຸ່ນນັ້ນ ສາມາດເບິ່ງໄດ້ທີ່ເວັບໄຊສະຖານທີ່ຍີ່ປຸ່ນປະຈຳປະເທດລາວທີ່ http://www.la.emb-japan.go.jp/
ໂດຍຫຼັກແລ້ວຈະມີວິຊ່າຢູ່ 3 ປະເພດຄື:
- ຢ້ຽມຢາມພີ່ນ້ອງ
- ຢ້ຽມຢາມຄົນຮູ້ຈັກ-ທ່ອງທ່ຽວ
- ວຽກທຸລະກິດໄລຍະສັ້ນ ແລະອື່ນໆ
ສຳລັບວິຊ່າທີ່ໄປຍື່ນໃນຄັ້ງນີ້ແມ່ນປະເພດທີສອງ ກໍຄືວິຊ່າສຳລັບທ່ອງທ່ຽວ
ການກະກຽມເອກະສານໃນເວັບໄຊລະບຸວ່າ:
(1) ຫນັງສືຜ່ານແດນ
ມີຫນ້າເຈ້ຍເພື່ອຈໍ້າວີຊາ 2 ຫນ້າຂື້ນໄປ. ຖ້າມີຫນັງສືຜ່ານແດນຫົວເກົ່າໃຫ້ຍື່ນພ້ອມ
(2) ຟອມຂໍວີຊາ 1 ໃບ
ເອົາຢູ່ສະຖານທູດ ຫລື ພີມເອົາຈາກເວບໄຊຂອງສະຖານທູດ
(3) ຮູບຖ່າຍ 1 ໃບ
ຖ່າຍພາຍໃນ 6 ເດືອນ, ຂະຫນາດ 4,5 ຊມ x 4,5 ຊມ, ຮູບສີ ຫລື ຂາວດໍາ ບໍ່ມີພາບດ້ານຫລັງ ແລະ ແຈ້ງດີ
(4) ໃບຈອງປີ້ຍົນໄປກັບ/ໃບຢັ້ງຢືນ
(5) ເອກະສານຢັ້ງຢືນການຮູ້ຈັກ (ກໍລະນີໄປຢ້ຽມຢາມຄົນຮູ້ຈັກ)
ຮູບຖ່າຍ, ຈົດຫມາຍ, ອີເມວ, ໃບບັນທຶກໂທທາງໄກ ແລະ ອື່ນໆ.
(6) ເອກະສານຢັ້ງຢືນຮັບປະກັນຄ່າໄຊ້ຈ່າຍ (ກໍລະນີຜູ້ຂໍວີຊາຮັບປະກັນຄ່າໄຊ້ຈ່າຍເອງ)
ໃບຢັ້ງຢືນລາຍຮັບອອກໃຫ້ໂດຍອົງການຂອງລັດ ຫລື ບັນຊີເງີນຝາກອື່ນໆ
(7)ສຳມະໂນຄົວລາວ
[ສິ່ງທີ່ຝ່າຍຍີ່ປຸ່ນຕ້ອງຕຽມ]
(1) ໃບແຈ້ງເຫດຜົນຂອງການເຊີນ
(2) ໃບຮັບປະກັນ
(3) ຕາຕະລາງການເຄື່ອນໄຫວ
(4) ເອກະສານຂອງຜູ້ຮັບປະກັນອັນໃດອັນຫນຶ່ງລຸ່ມນີ້ (ກໍລະນີຜູ້ເຊີນຮັບປະກັນຄ່າໄຊ້ຈ່າຍ) -ໃບຢັ້ງຢືນລາຍຮັບປະຈໍາປີ
-ໃບຢັ້ງຢືນເງີນຝາກ
-ໃບແຈ້ງເສຍພາສີ
-ໃບຢັ້ງຢືນເສຍພາສີ
(5) ໃບຢັ້ງຢືນທີ່ຢູ່ຂອງຜູ້ຮັບປະກັນ (ທີ່ຂຽນສາຍພົວພັນຄົນໃນຄອບຄົວທຸກຄົນ)
(6)ຄອບປີ້ພາສປອດ (ຫນ້າທີ່ມີເອກະລັກບຸກຄົນລວມທັງຫນ້າທີ່ມີກາຈໍ້າຕ່າງໆ)
(ໃນກໍລະນີຜູ້ເຊີນ ຫລື ຜູ້ຮັບປະກັນເປັນຄົນຕ່າງປະເທດ)
ແຕ່ວ່າຫຼັກໆ ສຳລັບການໄປທ່ອງທ່ຽວດ້ວຍຕົນເອງລະແມ່ນຕ້ອງມີ:
- ປຶ້ມພາສປອດເຮົາ (ຕ້ອງມີຫນ້າຫວ່າງ 2 ຫນ້າຂຶ້ນໄປ)
- ແບບຟອມວິຊ່າ (ດາວໂຫລດບ່ອນນີ້)
- ຮູບຖ່າຍຂະໜາດ 4.5×4.5 ຊມ ຈຳນວນ 1 ໃບ ຕ້ອງເປັນພື້ນຫຼັງສີຂາວ ໜ້າຊື່ ບໍ່ຍິ້ມ ບໍ່ເກີນ 6 ເດືອນ ໃສ່ເສື້ອທຳມະດາກໍໄດ້ບໍ່ຕ້ອງເສື້ອສູດ
- ໃບຈອງປີ້ຍົນໄປກັບ (ພິມ itinerary ຈາກອີເມວໄປກໍໄດ້)
- ເອກະສານຢັ້ງຢືນການເງິນ (ອັນນີ້ສຳຄັນເພາະເຂົາຢາກໄດ້ແທ້ໆ ບໍ່ແມ່ນໃບຢັ້ງຢືນການເງິນ ແຕ່ເປັນສະເຕດເມັ້ນຍ້ອນຫຼັງ 6 ເດືອນ! ຫຼືສາມາດເອົາປຶ້ມບັນຊີທະນາຄານເຮົາໄປແທນກໍໄດ້ ແຕ່ຕ້ອງເອົາໄປອັບເດດມາຫຼ້າສຸດກ່ອນ ໄດ້ຍິນວ່າຕ້ອງມີເງິນໃນບັນຊີ 20 ລ້ານຂຶ້ນໄປນຳ.)
- ສຳເນົາສຳມະໂນຄົວລາວ
- ຕາຕະລາງການເຄື່ອນໄຫວ (ອັນນີ້ສຳຄັນຫຼາຍ ເພາະໃນເວັບບອກວ່າຝ່າຍຍີ່ປຸ່ນຕ້ອງກຽມ ແຕ່ຄວາມຈິງເຮົາໄປເອງ ສະນັ້ນຕ້ອງກຽມເອງ ໂຫລດຕາຕະລາງທີ່ວ່າໄດ້ບ່ອນນີ້ ໃຫ້ຂຽນວ່າແຕ່ລະມື້ໄປໃສແດ່ ນອນໃສ ເບີໂທເບີຫຍັງ)
- ໃບຢັ້ງຢືນທີ່ຢູ່ (ໃນເວັບບອກວ່າເປັນສິ່ງທີ່ຝ່າຍຍີ່ປຸ່ນຕ້ອງກຽມ ທີ່ຈິງບອກຂໍ້ມູນຜິດ ເຮົານີ້ແຫລະຕ້ອງກຽມ!)
ກໍມີເທົ່ານີ້ທີ່ຈຳເປັນຕ້ອງໃຊ້ ກໍເອົາໄປຍື່ນ ຈະໄປຍື່ນເອງກໍໄດ້ ຝາກຄົນອື່ນໄປຍື່ນກໍໄດ້ ຍື່ນທີ່ສະຖານທູດຍີ່ປຸ່ນປະຈຳປະເທດລາວ ຕັ້ງຢູ່ຖະໜົນສີສັງວອນ ເບີໂທລະສັບ 021 414400-3 ຖ້ານັ່ງລົດເມໄປໃຫ້ຂຶ້ນລົດເມສາຍ 20 (ຕະຫຼາດເຊົ້າ-ດົງຄຳຊ້າງ) ລາຄາ 4,000 ກີບ ເຂົາຈະໄປລົງບໍ່ຮອດບ່ອນສະຖານທູດ ແຕ່ຍ່າງໄປຕໍ່ໄດ້ບໍ່ໄກຫຼາຍ
ສະຖານທູດຍີ່ປຸ່ນຈະມີຄວາມແປກປະຫຼາດຢ່າງນຶ່ງກໍຄືວ່າ ສາມາດເອົາໂທລະສັບເຂົ້າໄປໄດ້ ເອົາກະເປົາເຂົ້າໄປໄດ້ ບໍ່ຈຳເປັນຕ້ອງຝາກ ແລະບໍ່ຈຳເປັນຕ້ອງປິດໂທລະສັບມືຖື!!! ເຂົ້າໄປແລ້ວຍື່ນເອກະສານ ແລ້ວເຈົ້າໜ້າທີ່ຈະແຈ້ງວ່າຂາດຫຍັງແດ່ ຖ້າບໍ່ຂາດ ກໍຈະໄດ້ຮັບເອກະສານມາ 1 ໃບ ເປັນໃບນັດຮັບພາສປອດ ເຂົາເຈົ້າຈະໃຫ້ໂທມາຖາມວັນພະຫັດ ເພື່ອເບິ່ງວ່າໄດ້ຫຼືບໍ່ໄດ້ ຖ້າໄດ້ກໍມາເອົາວັນພະຫັດ ຫຼືສຸກ ພ້ອມຈັບເງິນມາ 214,000 ກີບເປັນຄ່າວິຊ່າ ຖ້າບໍ່ໄດ້ກໍບໍ່ເສຍ (ຖ້າວິຊ່າອາເມລິກາ ໄດ້ບໍ່ໄດ້ກໍເສຍ ເສຍແພງອີກ 555)
ຈົບແລ້ວ ຫວັງວ່າຈະເປັນປະໂຫຍດກັບຄົນທີ່ມາຊອກຫາຂໍ້ມູນ ຫາກສົງໃສບ່ອນໃດ ສອບຖາມໄດ້ທາງລຸ່ມ 🙂
